Møguligt samband millum vanlukkur

Løgreglan í Oslo er nú biðin um at kanna, um samband er millum eldin umborð á ferjuni Scandinavian Star og fleiri onnur óhapp og eld umborð á ferjum hjá somu eigarum.

Ein serlig kanningarnevnd hevur gjørt eitt yvirlit yvir allar tilburðir við skipum hjá feløgum, sum felagið, sum átti Scandinavian Star, arbeiddi við í áttatiárunum og nakað inn í nítiárini.

Alment hevði felagið SeaEscape selt skipið Scandinavien Star bara eina viku, áðrenn eldur kom í skipið. Men í skipaskránni í Bahamaoyggjunum stóð felagið framvegis sum eigari, og amerikanska felagið fekk tí útgoldið tryggingarpengarnar, til samans 14 milliónir dollarar.

Fyrrverandi kanningarleiðarin í sambandi við eldsbrunan á Scandinavian Star, Flemming Thue Jensen, segði herfyri, at onkur av manningini má hava sett eld á ferjuni.

159 fólk lótu lív í eldinum á Scandinavien Star í 1990.