Vinnunevndin arbeiðir við einum broytingaruppskoti

Bjarni Hammer, formaður í vinnunevndini, vil ikki siga, hvat broytingaruppskotið snýr seg um, men undir viðgerðini í gjár varð fleiri ferðir víst á, at eitt nú línuskip, sum hava fiskað á fjarleiðum í ár, og ikki hava brúkt fiskidagar undir Føroyum, verða revsað næsta fiskiár eftir nýggju skipanini um fiskidagabanka.

Hon ber í sær, at bara skip, sum hava brúkt fiskidagar í hesum fiskiárinum, fáa burtur úr puljuni, ella buffaranum, sum tikið verður til.

Bjarni Hammer, formaður í vinnunevndini, viðgekk í Løgtinginum í gjár, at skipini, sum hava givið grunnunum undir Føryum frið, verða revsað.

Triðja viðgerð í morgin

Við 2. viðgerð samtykti løgtingið eitt annað broytingaruppskot frá vinnunevndini. 

Høgni Hoydal, landsstýrismaður, bað nevndina um at skoyta upp í lógina, at maskinbrek ella sjúka eiga ikki at forða fyri, at skip ella bátar kunnu fáa eykafiskidagar eftir nýggju regluni í lógini um vinnuligan fiskiskap.

Hetta var samtykt við 16 atkvøðum. 

Triðja viðgerðin av lógini um fiskidagar verður í tinginum í morgin.