Erdogan: Ungur drongur bar sjálvmorðsbumbuna

Tað var eftir øllum at døma yvirgangsfelagsskapurin Islamskur Statur, sum skipaði fyri atsóknini at brúdleypsgestum í býnum Gaziantep í landsynningspartinum í Turkalandi leygarkvøldið.

Tað sigur turkiski forsetin, Erdogan, sambært tíðindastovuni AP. Hann sigur, at sjálvmorðsbumbumaðurin var bara millum 12 og 14 ára gamal.

Hann sigur, at eingin munur er á Islamskum Stati, kurdiskum uppreistrarbólkum ella G:ulen-rørsluni, sum Erdogan leggur undir at hava skipað fyri miseydnaðu kvettroyndini í Turkalandi fyrr í summar.

Eingin tikið ábyrgdina á seg

- Vit hava bara ein boðskap til teirra, sum leypa á okkum. Tað fer ikki at eydnast tykkum, sigur Recep Tayyip Erdogan í einari yvirlýsing.

Gazientep er 60 kilometrar frá sýriska markinum, og túsundtals fólk, sum eru flýdd undan krígnum í Sýria, búgva í býnum.

Eingin hevur átikið sær skyldina av sjálvmorðsbumbuatsóknini í leygarkvøldið, heldur ikki Islamskur Statur. 50 fólk doyðu í atsóknini og 69 fólk vórðu særd.