Góðtaka ikki sektaruppskot

Búsetur vil tí ikki góðtaka sektaruppskotið hjá fútanum, sum er 20.000 krónur, fyri at bróta kunngerðina um arbeiðsumhvørvi. Tí verður rættarfundur um málið klokkan eitt í dag.

Óhappið hendi tann 28. mars í 2014. Ein 31 ára gamal timburmaður fekk stóran skaða, tá hann datt gjøgnum eitt hol í tekjuni á einum bygningi í Havn.

Fallið var sjey metrar niður á betonggólv. Maðurin fekk varandi mein av óhappinum. Arbeiðseftirlitið staðfesti, at eingin fallverja var við opið í takinum.

SÍ EISINI Álvarsligt arbeiðsóhapp í Havn

Heldur ikki var onnur verja brúkt, so sum trygdarselar ella pallur ella nót undir opinum. Arbeiðið var tí ikki nóg væl fyriskipað, segði Arbeiðseftirlitið.

Arbeiðseftirlitið segði eisini, at talan var um eitt óhapp, sum kann henda. Men vantandi fallverja, girðing, við opið var beinleiðis orsøkin til, at óhappið gjørdist so ógvisligt.

Arbeiðseftirlitið meldaði í juli 2014 Búsetur og mælti til, at Búsetur fekk 20.000 krónur í bót. Men Búsetur vil ikki gjalda, tí felagið noktar at hava brotið kunngerðina um arbeiðsumhvørvi.