Danmark og ES: Bannið hvalaveiðuni

Danmark fer sostatt at atkvøða sum ES vil, og ikki sum Føroyar og Grønland vilja, tá uppskotið skal viðgerast í altjóða hvalaveiðunevndini, IWC, í døgunum frá 20. til 28. oktober.

- Hetta er enn eitt dømi um, at tað er ein trupulleiki, at Danmark skal atkvøða fyri alt ríkið, tí londini hava ikki somu áhugamál, sigur Sjúrður Skaale, fólkatingsmaður, við Sermitsiaq.

Danski uttanríkisráðharrin Kristian Jensen hevur boðað frá donsku støðuni í málinum, men fólkatingsumboðini úr Føroyum og Grønland hava gjørt vart við, at tey taka ikki undir við uppskotinum.

Fólkatingskvinna finst at donsku stjórnini

Fólkatingsumboðini óttast, at verður suðuríshavið friðað, kann tað við tíðini elva til, at forboð verður sett fyri hvalaveiðu í Arktis og norðuratlantshavinum. 

- Ríkisfelagsskapurin kann ikki halda eina kós, tí Føroyar og Grønland vilja ikki altíð tað, sum Danmark vil, og í øðrum førum vilja Føroyar og Grønland ikki tað sama, sigur hann.

Eisini grønlendska fólkatingskvinnan Aaja Larsen finst at donsku støðuni.

- Ríkisfelagsskapurin rúmar ikki altíð mótstríðandi áhugamálum og grønlendskum áhugamálum, sigur hon.

- Tað eru okkara áhugamál, sum hava størstan týdning í hesum málinum, sigur hon og sipar til, at hvalaveiðan hevur stóran búskaparligan og mentanarliga týdning fyri Grønland.

- Tí mugu vit kanna, hvussu okkara støða í IWC kann styrkjast, sigur hon við Sermitsiaq.

Danmark er limur í Altjóða hvalaveiðunevndini, tí grønlendingar og føroyingar drepa hval.