Oyðsl á Amager

Nýggja, stóra høllin í Ørestad á Amager verður skjótt liðug. Hon skal brúkast til ítróttar- og konsert-tiltøk, og einki er spart, heldur ikki uppá hotel- og matstovurokningarnar hjá teimum, ið hava staðið fyri byggiarbeiðinum.

Blaðið Berlingske hevur gjøgnumgingið túsund fylgiskjøl hjá felagnum Arena CPHX, ið stendur fyri byggingini, og blaðið skrivar, at meira enn tvær milliónir krónur eru brúktar á matstovum, til ferðir, umboðan og uppá at styrkja felagsskapin millum starvsfókið.

Marglætisgildi og ferðir

Til dømis var rokningin 42.000 krónur, tá 19 starvsfólk høvdu verið til jólaborðhald.

Tá fimm fólk høvdu verið í USA var rokningin 200.000 kr., og tá eitt starvsfólk hevði verið í Singapore á ráðstevnu var rokningin úr barrini á hotellinum 5.000 kr.

Helst svik

Peninganýtslan liggur á markinum til at vera heimildarsvik, siga fólk við blaðið, ið duga at meta um slíkt.

Útreiðslurnar eru farnar langt upp um tað, ið góðtikið verður innan tað almenna, tí talan er um skattaborgarans pening, sigur Bente Hagelund, løgfrøðingur og serfrøðingur í fyrisitingarrætti við Berlingske.

Kommunan kannar málið

Keypmannahavnar kommuna eigur 325 milliónir krónur ella helvtina av tí, høllin kostar at byggja.

Frank Jensen, yvirborgarstjóri í Keypmannahavn, hevur í tíðindaskrivi boðað frá, at kommunan fer at kanna, um Arena CPHX hevur brotið reglurnar.