Anis Amri sæddur í Berlin mánakvøldið

Tunesarin, Anis Amri, sum er undir illgruna fyri at hava skipað fyri atsóknini at einum jólamarknaði í Berlin mánakvøldið, varð sæddur á einum vakmyndatóli fáar tímar eftir atsóknina, skriva týskir miðlar. 24 ára gamli maðurin er sæddur á vakmyndatólum við eina mosku í økinum Moabit í miðbýnum í Berlin. Útvarps- og sjónvarpsstøðin, RBB, veit at siga, at fólk, sum taka undir við Islamskum Stati, halda til í hesi moskuni.

Fyrrapartin í gjár gjørdi løgreglan húsarannsókn í moskuni. Leiðarin fyri moskuna umrøddi hana sum Moskuna fyri IS-viðhaldsfólk í Berlin í eini telefonsamrøðu, sum týska fregnartænastan hevur avlurtað, sigur RBB.

Atsóknin mánakvøldið kravdi 12 mannalív, og umleið 50 vórðu løstað. Løgreglan heldur seg hava gott um at halda í jagstranini eftir Anis Amri, sum er eftirlýstur um allan heimin. Samleikaprógv hjá honum eru funnin í lastbilinum, sum koyrdi á mannamúgvuna, og í gjár vórðu fingramerki eisini funnin í bilinum. Løgreglan sigur, at eftirlýsti maðurin kann hava fingið skaða í andlitið, og at hann møguliga er í týska høvuðsstaðnum, skrivar dagblaðið Der Tagesspiegel.

Løgreglan hevur havt eyguni eftir Anis Amri í fleiri mánaðir, men hevur ikki havt nóg góð prógv fyri at handtaka hann.