Heldur fyrsta tíðindafundin um eina viku

Komandi forsetin í USA, Donald Trump, boðar frá á Twitter, at hann fer at halda sín fyrsta veruliga tíðindafund síðan valið um eina viku, tann 11. januar í New York.

Donald Trump hevur, sambært AFP-tíðindastovuni, ikki hildið slíkan tíðindafund síðan í juli mánaði.

Greinin heldur fram niðanfyri

I will be having a general news conference on JANUARY ELEVENTH in N.Y.C. Thank you.

— Donald J. Trump (@realDonaldTrump) January 3, 2017

Upprunaliga var ætlanin, at tíðindafundur skuldi vera 15. desember, har Donald Trump skuldi greiða frá, hvussu hann vildi forða fyri at stríð verður um hansara mongu fyritøkur og forsetaembætið. Men tað bleiv útsett.

Við sínum seinkaða tíðindafundi hevur Donald Trump brotið eina siðvenju. Nývaldir forsetar halda vanliga tíðindafundir stutt eftir, at tað er greitt, at teir fara at yvirtaka embætið, har teir upplýsa um komandi politikkin.

Donald Trump hevur síðan valið verið í nøkrum fáum samrøðum og hevur hildið talur fyri viðhaldsfólkum. Í farna mánaði kunngjørdi hann, at stóra japanska telefyritøkan, Softbank, fer at skapa 50.000 nýggj arbeiðspláss í USA.