Tummas Eliasen í Landsbankanevndina

Kommunufelagið hevur nú tilnevnt Tummas Eliasen til nevndarsessin í Landsbankanum.

Hann var upprunaliga í uppskoti til varalim, men eftir at fyrsta boð varð vrakað av Fíggjarmálaráðnum, gjørdi Kommunufelagið á fundi í gjár av, at Tummas Eliasen verður teirra tilmæli.

Fíggjarmálaráðið hevði undan fundinum í gjár boðað Kommunufelagnum frá, at Tummas Eliasen, kommunustjóri í Klaksvík, lýkur lógarkrøvini um førleikar.

Kommunufelagið hevur somuleiðis tilnevnt Jógvan Kruse, fíggjar- og fyrisitingarleiðara í Sunda kommunu, at vera varalimur hjá Tummasi Eliasen í nevndini fyri Landsbankan.

Tann tilnevningin er enn ikki góðkend av Fíggjarmálaráðnum.

Sjey fólk eru í nevndini fyri Landsbankan. Tey eru Zvonko Mrdalo, Elisabeth Eldevig, Kristoffur Laksá, Ninna Herdis Danielsen, Edvard Heen, Jan Otto Holm og Tummas Eliasen.

Nevndin hevur enn ikki skipað seg.