Hundraðtals fólk lupu á marknalið

Fleiri migrantar fingu skaða og nógv onnur vórðu flutt á sjúkrahús, tá umleið 350 fólk í morgun royndu at koma um eitt marknalið í Marokko

Hundraðtals migrantar lupu í morgun á marknaliðið til spanskt øki í Marokko, Ceuta. Fleiri fingu skaða og onnur vórðu flutt á sjúkrahús

Mynd: AP

Sigrún H. Brend

20.02.2017 - 16:24

Hundraðtals migrantar lupu í morgun á marknaliðið til spanskt øki í Marokko, Ceuta. Tað upplýsir Reyði Krossur á Twitter.

Teir útivið 350 migrantarnir kluvu upp um høga hegnið, sum skilir landaoynna Ceuta frá Marokko. Fleiri fingu, sambært blaðnum El Pais, skaða, og í minsta lagi 11 vórðu flutt til kanningar á sjúkrahúsi.

Aðru ferð eftir fáum døgum

Hetta er aðru ferð í tríggjar dagar, at migrantar leypa á markið til spanska landaøkið í Norðurafrika. Fríggjadagin trokaðu 500 seg inn. Tá fingu løgreglufólk og migrantar løstir, tá migrantarnir kluvu uppum seks-metrarhøga hegnið, sum er klætt við píkatráði.

Eftir nýggjár eydnaðist fleiri enn 1.000 migrantum at klíva upp á hegnið, men ein krani tók tey niður aftur. Spania hevur tvær landaoyggjar í Marokko. Umframt Ceuta er eisini Melilla.

Í 2016 komu til samans 1.000 migrantar til Spania gjøgnum hegnini rundan um sponsku landaoyggjarnar, skrivar El Pais. Talið er metlágt samanborið við undanfarin ár, skrivar Ritzau.