Loyvið til vatnorkuna endurnýggjað

SEV sleppur at nýta vatnorkuna í Streymoynni, Eysturoynni, Vágum og í Suðuroynni í 20 ár aftrat, men onnur kunnu eisini sleppa at nýta vatnið

SEV sleppur at brúka vatnorkuna í nøkrum oyggjum nøkur ár aftrat. Nýggja loyvið er galdandi í 20 ár, men tey eru avmarkað í økisvídd

Johnsigurd Johannesen

Bjarni Mohr

15.03.2017 - 14:09

Tað hevur Sirið Stenberg, landsstýriskvinna í orkumálum, gjørt av. Í 1963 fekk SEV loyvi at nýta vatnorkuna í Streymoynni, Eysturoynni, Vágum og Suðuroyunni í 50 ár.

Loyvið hevur verið longt, meðan arbeitt hevur verið við at lata nýggju loyvini. Verandi framleiðsluloyvi fara úr gildi í 2019.

Nýggja loyvið er galdandi í 20 ár, men tey eru avmarkað í økisvíddd, so tey bara fevna um innsavningarøkini, haðani SEV hevur fingið vatnorkuna til verandi verk, og ikki um heilar oyggjar.

SÍ EISINI Virða ikki hoyringsrættin

Ein annar munur er, at landsstýriskvinnan eisini kann loyva øðrum at gagnnýta vatnorkuna í somu økjum. Tó skal fyrilit takast fyri virkseminum hjá SEV.

Tað er umráðandi, at so týðandi grundarsteinur undir samfelagsvirkseminum, sum elframleiðsla er, hevur so tryggar karmar sum til ber, sigur Sirið Stenberg, landsstýriskvinna.

- Hinvegin skal myndugleikin eisini hava møguleika at lata nýggj loyvi at gagnnýta vatnorkuna, um umsøkjararnir hava fingið loyvi til at framleiða el, sigur Sirið Stenberg.