Uppskot skal tryggja størri gjøgnumskygni

Trivnaðarnevndin tekur einmælt undir við uppskotinum hjá Heilsumálaráðnum um at broyta donsku lógina um sálarfrøðingar í Føroyum.

Endamálið við lógaruppskotinum er at broyta samansetingina av Psykolognævnet og at styrkja eftirlitsvirksemið hjá Psykolognævnet. 

Við uppskotinum fær Psykolognævnet møguleika at geva einum løggildum sálarfrøðingi boð um at broyta virksemið hjá sær.

Felag mælti frá at gera broytingar

Psykolognævnet kann eisini skerpa eftirlitið, um ein sálarfrøðingur hevur víst álvarsamt ella afturvendandi atfinningarsamt fakligt virksemi. 

Eisini verður skotið upp, at avgerðir hjá Psykolognævnet um álvarsamar atfinningar, faklig boð og skerpað eftirlit verða almannakunngjørdar. 

Hóast Felagið føroyskir sálarfrøðingar mælti frá, varð lógaruppskotið ikki broytt. Heilsumálaráðið sigur, at sum er fáa føroyskir myndugleikar ikki at vita, tá Psykolognævnet finst at sálarfrøðingum í Føroyum.

Fyrimunur fyri føroysku myndugleikarnar

Føroysku myndugleikarnir vita heldur ikki, um sálarfrøðingar í Danmark, ið hava fingið atfinningar, søkja um starv í Føroyum.

Tí er tað ein fyrimunur, at avgerðirnar hjá Psykolognævnet verða almennar, tí so kunnu myndugleikarnir í Føroyum kunna seg tann vegin.  

Felagið føroyskir sálarfrøðingar sigur tað vera umráðandi, at føroyskir myndugleikar legga upp fyri, hvussu avgerðirnar hjá Psykolognævnet verða nýttar og almannakunngjørdar í Føroyum.