Svarið um fosturtøkur í Danmark bíðar til august

Ikki fyrr enn um ein mánað fæst at vita, um nøkur tøl eru, sum siga, hvussu nógvar føroyskar kvinnur fara til Danmarkar at fáa fosturtøku.  

Danski heilsumálaráðharrin, Ellen Trane Nørby, hevur fyribils svarað einum fyrispurningi frá Føroyanevndini í fólkatinginum. 

Hon sigur, at hon fær ikki svarað, áðrenn freistin fer, tí summarfrí er, og hon skal spyrja Sundhedsdatastyrelsen, áðrenn hon fær svarað.

Ellen Trane Nørby sigur seg vænta at svara endaliga síðst í august.

Føroyanevndin spyr fyri Magna Arge, fólkatingsmann.

Hann sigur, at í Statistisk Årbog 2017 stendur, at í 2013 vóru 36 fosturtøkur í Føroyum fyri hvørji 1000 fødd børn. 

Í Danmark var hetta talið 259 í 2014.

Lógin í Føroyum er strangari

Magni Arge sigur, at ein orsøk kann vera tann, at Danmark fekk eina nýggja fosturtøkulóg í 1973.

Hon er lagaligari enn gamla lógin frá 1956, sum tó framvegis er galdandi í Føroyum.

Men ein onnur frágreiðing kann vera tann, sigur Magni Arge, at nógvar føroyskar kvinnur fáa fosturtøku uttanlands.  

Heilsumálaráðharrin fær tí spurningin, um nøkur hagtøl eru um hesar kvinnur.

Spurt verður, hvussu nógvar kvinnur, sum búgva í Føroyum, hava fingið fosturtøku í Danmark seinastu 20 árini, og hvussu nógvar hvørt árið.