Kvinnuligir roykjarar í stórum vanda

Ungar kvinnur, sum roykja illa, áðrenn tær eiga sítt fyrsta barn, eru í munandi størri vanda at fáa bróstkrabba, tá tær blíva eldri. Og vandin minkar ikki, hóast tær gevast at roykja.

Tað vísir ein stór kanning, sum granskarar á universitetinum í Keypmannahavn hava gjørt. Granskararnir hava fylgt við 21.000 donskum sjúkrarøktarfrøðingum í meir enn 15 ár.

Hetta veit danska blaðið Jyllands-Posten at siga.

Granskararnir kunnu nú við vissu siga, at kvinnur, sum roykja, at vandin at fáa bróstkrabba er 27 prosent størri samanborið við kvinnur, ið ongantíð hava roykt.

Jú meira og í longri tíð kvinnurnar roykja, jú størri gerst vandin at fáa krabbamein í bróstini.

Royking er serliga vandamikil fyri tær kvinnurnar, sum eru byrjaðar at roykja á ungum árum, og sum tá hava roykt illa. Vandin fyri, at tær fáa bróstkrabba, er øktur við ikki færri enn 58 prosentum, siga granskararnir.

Við hesi kanningini ber til at staðfesta, at tað ger ongan mun í sambandi við bróstkrabba, um ein kvinna gevst at roykja, um hon, áðrenn hon fekk fyrsta barnið, roykti millum 15 og 20 sigarettir í 10 ár.

Hetta er fyrstu ferð, at tað er prógvað, at royking spælir ein stóran leiklut í sambandi við krabbamein í bróstunum.