Innbúgv og búnýti vorðið bíligari

Vit keypa munandi meira búnýti og innbúgv í dag enn fyri fimm árum síðani.

Men vørurnar, vit keypa, eru eisini munandi bíligari enn fyri fimm árum síðani.

Tí meðan tøl frá Hagstovuni vísa, at umsetningurin er vaksin við góðum 40 prosentum, so er mongdin vaksin við meir enn einari helvt.

Birgir Andreasen, nevndarformaður í Idé Møblum, kennir tølini aftur. "Hagtølini vísa, at prísirnir eru lækkaðir á innbúgv og búnýti. Orsøkin er, at kappingin er gróthørð, og vit eru fleiri stórir búnýtis- og innbúgvshandlar í Føroyum. Stór kapping er um kundarnar, og tí hava vit lækkað prísin á innbúgvi", sigur Birgir Anreasen.