Føroyingar og danir við skerdan lut í Grønlandi

Fólk, sum flyta til Grønlands, eitt nú føroyingar og danir, sleppa ov tíðliga at velja landsting.

Tað er heldur landsstýrisflokkurin, Siumut, sum fer at reisa spurningin um at broyta vallógina í einum spurnarorðaskifti í landstinginum í november, skrivar Sermitsiak.

Eftir galdandi lóg kunnu fólk, sum hava búð í Grønlandi í eitt hálvt ár, sleppa á val. 

Siumut heldur, at hesir tilflytararnir fáa ov stóra ávirkan, og flokkurin mælir til, at tú skalt hava havt fastan bústað í Grønlandi í 2-7 ár, áðrenn tú sleppur á val.

Fleiri valdømi

Siumut harmast eisini um, at Grønland gjørdist eitt valdømi í 1998.

Tað hevur havt við sær, at summir partar av landinum ikki longur eru umboðaðir í landstinginum, og hetta er við til at til at skerja demokratisku rættindini hjá fólkinum, sigur Siumut.

Flokkurin skjýtur tí upp, at fleiri valdømi aftur verða skipað í Grønlandi. 

Siumut sigur seg vóna, at orðaskiftið í landstinginum kann enda við, at uppskot um broytingar í vallógini verður lagt fram næsta ár. 

IA ímóti

Flokkurin IA, sum eisini situr í grønlendska landsstýrinum, tekur ikki undir við uppskotinum hjá Siumut. 

- Vit halda, at minnilutaverja hevur stóran týdning fyri fókaræðið, sigur Bendt B. Kristiansen í IA við grønlendska kringvarpið. 

Tí eiga fólk úr hinum partinum av ríkisfelagsskapinum at fáa valrætt, sigur hann.

Bendt B. Kristiansen vísir á, at Grønland sum minniluti í ríkisfelagsskapinum noyðist at berjast fyri sínum áhugamálum. Á sama hátt eigur ein minniluti í grønlendska samfelagnum at verða vardur, sigur hann.

Danskir framsøgumenn: Ódemokratiskt

Framsøgumonnunum í grønlendskum málum hjá konservativa flokkinum og Eindarlistanum á fólkatingi dámar lítið uppskotið hjá Siumut, um at tey, sum flyta til Grønlands, ikki skulu fáa valrætt beinan vegin.

- Tað er spell, at eitt slíkt uppskot kemur, tí tað er á markinum at vera ódemokratiskt, sigur Rasmus Jarlov í konservativa flokkinum.

Christian Juhl í Eindarlistanum sigur, at tá grønlendingar sleppa til valborðið í Dammark, eigur tað sama at galda hinvegin.

Rasmus Jarlov heldur, at uppskotið sendir eitt tekin um, at danir eru ikki vælkomnir í Grønlandi longur.