Stjórnin í Katalonia koyrd frá

Spanski forsætisráðharrin fer at koyra stjórnina í Katalonina frá, og val verður í landspartinum skjótast gjørligt.

Tað sigur Mariano Rajoy, forsætisráðharri, eftir at spanska stjórnin í dag hevur gjørt av at seta grein 155 í grundlógini í gildi, sum tekur sjálvstýri frá Katalonia.

- Lóg og landaskil skal valda í landspartinum, sigur Rajoy.

Fyribils fara ráðharrar í stjórnini í Madrid at stýra Katalonia.

Formliga hevur Katalonia framvegis sjálvstýri, og tingið er heldur ikki upployst, men tingið kann hvørki tilnevna nýggja stjórn ella forseta fyri valið, sigur spanski forsætisráðharrin.

Áðrenn grein 155 kann verða sett í verk, skal ein nevnd í spanska senatinum viðgera umbønina frá stjórnina um at seta hana verk. Tað verður væntandi seinnapartin í næstu viku.

Hetta er fyrstu ferð, at ein stjórn biður um at seta grein 155 í grundlógini frá 1978 gildi.

Ólóglig fólkaatkvøða

Stjórnin í Madrid tekur valdið í Katalonia í kjalarvørrinum av fólkaatkvøðuni 1. oktober um at loysa Katalonia frá Spania.

Bæði stjórnin og hægstirættur hava sagt, at fólkaatkvøðan var ólóglig.

Stjórnin hevur síðani fleiri ferðir heitt á sjálvstýrismyndugleikarnar í Barcelona um at vísa aftur, at landsparturin fer at loysa, men Mariano Rajoy, forsætisráðharri, sigur, at tað hevur Katalonia ikki gjørt.

Nú frættist, at sjálvstýrisstjórnin í Katalonina fer mánadagin at boða frá, um hon ætlr at lýsa landspartin sum sjálvstøðugt land.