Mugu rinda meir

Bretski forsætisráðharrin, Theresa May, hevur fingið at vita, at hon hevur tvær vikur at leggja meira pengar á borðið, um ES skal taka undir við at fara undir samráðingar um handilsviðurskifti fyri nýggjár.

Tað skrivar BBC á heimasíðuni.

Donald Tusk, forseti í evroparáðnum sigur, at hann er til reiðar at fara undir næsta stig í samráðingunum, sum snýr seg um framtíðarsambandið millum Bretland og ES. Men skal hetta vera møguligt má bretland vísa ein størri vilja í sambandi við sonevndu "divorce bill" - tað er rokningin, sum Bretland skal gjalda ES í sambandi við at landið tekur seg úr felagsskapinum.

Kravið hjá ES liggur um 60 milliardir evrur.

Harafturat er fleiri spurningar um, hvussu markið millum Írland og Norðurírland skal handfarast.

Næsti fundur millum ES leiðarar er 14. desember, og Donald Tusk forseti ætlar bara at viðmæla leiðarunum at fara víðari við samráðingunum, um Bretland leggur fleiri pengar á borðið, sigur hann.

Fleiri bretskir politikarar hjá teimum konservativu halda, at Bretland skal spenna meira við musklunum og gevast við at samráðast, um ikki ES linkar hørðu treytirnar. ES hevur líka nógv at missa sum Bretland um ein góð avtala ikki kemur í lag, halda teir.