Myndugleikar heita á fólk um at rýma

Tilbúgvingin er samstundis hækkað upp í hægsta stig.

Leygardagin fór Agung aftur at goysa, og øskan stóð hálvan annan kilometur upp i loft.

Stúrt verður fyri, at tað fer at goysa uppaftur meira, tí eldgosið er sera virkið, og nógvar spreingingar eru at hoyra.

Myndugleikarnir á Bali upplýsa fyri AP-tíðindastovuni, at neyðugt verður at flyta umleið 100.000 fólk burtur úr vandaøkinum.

Higartil eru umleið 25.000 fólk flutt burtur, og altjóða floghavnin á oynni er stongd.

Agung er hægsta fjall á Bali, og er umleið 3.000 metrar.

Seinast, Agung fór at goysa, var í 1963, og tá doyðu meira enn 1.000 fólk.