Níggju fólk skulu fremja og styrkja kjak um etikk

Etiska ráðið er nú valt.

Hildur við Høgadalsá, sjúkrarøktarfrøðingur, er forkvinna í ráðnum.

Hini átta, sum Sirið Stenberg, landsstýriskvinna, hevur tilnevnt, eru Steintóra Samuelsen, serlækni, politisku flokkarnir skutu upp Jógvan D. Hansen, heimspeking, Richard Schwartzson, farmaseut, og  Sólbjørg Frederiksberg, fysioterapeut, Jákup H. Foldbo, sosiologur, er fyri Kommunufelagið, landsstýriskvinna í almannamálum skeyt upp Leif Olsen, sosialráðgeva, landsstýrismaðurin í uttanríkis- og vinnumálum skeyt upp Debes H. Christiansen, lívfrøðing, og landsstýriskvinnan í mentamálum mælti til at seta Marjuna Bæk, fyrrverandi sóknarprest, í Etiska ráðið.

Óheft ráð

Endamálið við Etiska ráðnum er at fremja og styrkja kjak og vitan um etiskar spurningar um bio- og ílegutøkni, sum hava ávirkan á lívið hjá menniskjum.

Ráðið kann harumframt fremja og styrkja kjak um aðrar almennar og prinsipiellar etiskar spurningar um heilsufakliga virksemið á heilsuøkinum, almannaøkinum og kommunuøkinum.

Ráðið virkar óheft og velur sjálvt tey evni og teir spurningar, sum ráðið viðgerð. 

Ikki er neyðugt, at ráðið er samt í sínum niðurstøðum um ávís mál, tí endamálið er at fremja og styrkja kjak og vitan um etiskar spurningar, heldur enn at koma við avgjørdum niðurstøðum.

Etiska ráðið fer til verka á nýggjárinum.