Ferja sokkin út fyri Filipsoyggjunum

258 fólk vóru umborð. Bjargingarskip og tyrlur vóru send til økið, men illveðrið tarnaði bjargingini.

Ferjan fór at leka á leiðini frá oynni Polillo, skrivar AP-tíðindastovan. Ringt veður var á leiðini, tá ferjan fekk trupulleikar.

Talsmaður fyri sjóverjuna í Filipsoyggjum, Armand Balilo, sigur, at veðrið er helst høvuðsorsøkin til vanlukkuna. Hann leggur afturat, at skipið varð góðkent til 280 ferðandi, skrivar BBC.

Ein av teimum, sum slapp frá hendignini við lívinum, Donel Jade Mendiola, sigur, at tey høvdu siglt einar tveir tímar, tá ferjan kom í illveður og fekk trupulleikar.

Ferjan fekk motorskaða og fór at leka. Ferðafólkini fóru øll út í annað borðið, og tá tók hon nógvan sjógv inn og sakk, skrivar NTB-tíðindastovan.