Undirtøkan fyri norska javnaðarflokkinum minkar

Hóast norski javnaðarflokkurin í fleiri ár hevur verið í andstøðu, so minkar undirtøkan støðugt ímillum norsku veljararnar.

Ein meiningakanning sum júst er gjørd, vísir, at flokkurin hevur eina afturgongd uppá meir enn trý prosentstig, í mun til eina líknandi kanning herfyri, og flokkurin hevði nú fingið 22,7 prosent av atkvøðunum. So vánalig hevur undirtøkan hjá flokkinum ikki verið síðani í 2003.

Flokkurin hevur verið í andróðri seinastu tíðina, tí skuldsetingarnar eru nógvar um óflýggjaskap, og tað hevði herfyri við sær, at næstformaðurin í flokkinum, Trond Giske, legði frá sær.

Eisini í stjórnarflokkunum, Høgra og Framburðsflokkinum, eru fleiri fráboðanir komnar seinastu tíðina um óflýggjaskap, og tí kunnu teir flokkartnir eisini rokna við at fáa mótstøðu í fólkinum á meiningakanningum sum verða gjørdar í næstum.

Alt annað vildi verið løgið, sigur valgranskarin, Bernt Aardal.

Flokkurin Vinstri, sum eisini er við í samgonguni, missir undirtøku, og var val nú, so hevði flokkurin verið undir sperrumarkinum.

Eftir kanningini hevði Høgri flokkurin fingið 30,4 prosent av atkvøðunum, og verið nógv størsti flokkur.