Eingin greiður vinnari í Italia

Ongin greiður vinnari er funnin á italska stjórnarvalinum í gjár. Mið-høgra samgongan saman við Forza Italia, sum er flokkurin hjá fyrrverandi stjórnarleiðaranum Silvio Berlusconi, saman við øðrum fáa flestu atkvøðurnar, men ikki meirilutan.

Samstundis sær út til, at Fimmstjørnurørslan hevur fingið eitt sera gott val og verður størsti flokkur.

Hóast uppteljingin ikki er liðug, hevur sitandi stjórnarflokkurin, Partito Democratio, longu viðurkent tapið, skrivar Ritzau.

Sambært kanningum á valstøðunum fær sitandi stjórnin um 20 prosent av atkvøðunum, meðan mið høgra samgongan fær 35,5 prosent. Alt bendir á, at størsti flokkur verður Fimmstjørnurørslan við 32,5 prosentum.

Sostatt er ongin greiður vinnari á valinum, og politiskir viðmerkjarar í Italia siga, sambært AP, at hesi kanningarúrslitini benda á, at tað skal samráðast í eyst og vest til tess at fáa ein meiriluta.

Greinarin Lorenzo Codogno væntar, sambært AP, at stjórnarsamráðingarnar verða drúgvar og truplar.

Hann væntar eisini, at tað fer at ávirka altjóða fíggjarmarknaðurin skeiva vegin, at Fimmstjørnurørslan verður størsti flokkur á italska stjórnarvalinum.

Flokkarnir sjálvir bíða við at koma við viðmerkingum til endaliga úrslitið av italska valinum verður almannakunngjørt.

Umleið helmingurin av atkvøðunum eru upptaldar nú í morgun. Tað er tó ógreitt enn, nær endaliga úrslitið verður klárt.