Sarkozy skuldsettur fyri mutur

Tað skrivar franskir miðlar, teirra millum Le Monde.

Sarkozy er skuldsettur, eftir at løgreglan hevur avhoyrt hann í meira enn 20 tímar, um hvussu forsetavalstríðið varð fíggjað í 2007.

Fronsku antikorrupsjóns-myndugleikarnir hava kannað málið í fimm ár. 

Sarkozy hevur verið undir illgruna fyri at hava tikið í móti 50 milliónum evrum frá stýrinum hjá fyrrverandi libyska leiðaranum, Gadaffi, at reka valstríð fyri í Fraklandi.

Upphæddin er tvær ferðir størri, enn lógin loyvir politikarum í Fraklandi at taka ímóti í stuðli. Og hetta stríðir eisini ímóti reglunum um at taka ímóti útlendskum peningastuðli.

Sarkozy hevur víst øllum skuldsetingum aftur.

Nicolas Sarkozy var forseti í Fraklandi frá 2007 til 2012. Hann er framvegis virkin í politikki í Fraklandi.