Skuldsettur fyri dráp og drápsroyndir

Maðurin, sum er undir illgruna at tilvitað hava rent á og dripið 10 fólk á einum gonguteigi í Toronto mánadagin, er skuldsettur fyri 10 drápstilburðir og 13 drápsroyndir.

Hetta veit tíðindastovan Ritzau at siga.

Tann 25 ára gamli maðurin royndi at flýggja, beint eftir at hann seinnapartin mánadagin í einum vøruvogni koyrdi á fleiri fólk á einum gonguteigi í norðrara parti av Toronto í Kanada.

Løgreglan fekk tó fatur á manninum bert sjey minuttir eftir at ringt varð til alarmsentralin.

Í gjár møtti skuldsetti maðurin í rættinum í Toronto í reyðari fangadrakt við einum sakførara.

Løgregluovastin í Toronto, Mark Saunders, segði á tíðindafundi eftir hendingina mánadagin, at hendingin við vøruvogninum ivaleyst var tilvitað.

Løgreglan kendi ikki tann 25 ára gamla mannin frammanundan.