- Tíðindi, mentan og ítróttur
Hans Fróði á Toftanesi fekk 3 ár og 9 mánaðir
![](https://kvf.fo/sites/default/files/styles/grein-ovasta-mynd/public/retten.jpg?itok=mCbUpq8r)
Hans Fróði á Toftanesi, áður nevndur Hansen, varð í dag dømdur trý ár og níggju mánaðar fongsulsrevsing í rættinum í Lyngby m.a. fyri kynslig brotsverk móti einum smádrongi.
Harvið fekk hann sama dóm sum mamma drongin. Hon fekk fyri kortum eisini trý ár og níggju mánaðar fongsulsrevsing fyri kynslig brotsverk.
Dagføring klokkan 15.45:
Helt ikki tað var veruleiki
Sambært danska dagblaðnum, Ekstra Bladet, fekk føroyingurin møguleika fyri at siga eina síðstu viðmerking, áðrenn dómur varð givin.
Hans Fróði á Toftanesi segði seg vera harman um støðuna, men hann segði eisini, at hann kundi ikki játta seg sekan í onkrum, sum hann ikki hevði gjørt.
- Um eg líti aftur: Eri eg ein býttlingur? Avgjørt. Havi eg gjørt nakað skeivt? Ja. Var tað við vilja? Ongantíð, segði Hans Fróði á Toftanesi.
Hans Fróði á Toftanesi vardi seg við, at hann helt talan var um fantasi og ikki veruleika. Ákærin í málinum kravdi, at føroyingurin skuldi fáa harðari revsing enn mamman, tí Hans Fróði á Toftanesi skipaði fyri øllum misbrúkinum.
Ákærin legði samstundis dent á, at framsøgnin hjá dømda føroyinginum var óálítandi, tí hann ofta bað um myndaprógv fyri misbrúkini, sum hann bað kvinnuna gera.
Krevur frídøming
Hans Fróði á Toftanesi fekk tó somu revsing sum kvinnan í málinum, og umframt fongsulsrevsingina skal Hans Fróði á Toftanesi gjalda sakarmálskostnaðin, og hann skal rinda misbrúkta dronginum 100.000 krónur í endurgjaldi.
Dómurin er treytaleysur.
Hans Fróði á Toftanesi kærdi alt fyri eitt dómin til Eystara Landsrætt við kravi um frídøming. Hann skal framhaldandi sita í varðhaldi, til kærumálið kemur fyri.
Á filmsbrotinum niðanfyri sæst, tá dómur varð sagdur í málinum fyrr í dag.