Landið seldi sild fyri næstan tíggju milliónir

Hvalnes í Klaksvík, sum eigur Norðborg, keypti rættin at fiska 3.350 tons av norðhavssild á uppboðssølu í gjár.

Sildin kostaði 1,96 kr. fyri kilo, so Hvalnes keypti fyri góðar 6,5 mió. kr.

Trý onnur feløg keyptu nógv smærri nøgdir.

Næraberg keypti rættin at fiska 700 tons fyri 1,91 kr./kilo, Jókin keypti 550 tons fyri 2,07 kr./kilo, og Framherji keypti 400 tons fyri 1,89 kr./kilo.

Rættindini at fiska tey 5.000 tonsini av norðhavssild vórðu seld fyri 9,8 mió. kr.

Seks buðu upp á rættindini, men fýra keyptu. Talan er um ársrættindi.

Tvær eftir í juni

Tvær uppboðssølur eru eftir í juni.

Í morgin verða seld rættindini at fiska 7.490 tons av norðhavssild á afturlatnari uppboðssølu og 27. juni verða seld rættindini at fiska 10.901 tons av makreli á afturlatnari uppboðssølu.

Í báðum førum er talan um rættindi í eitt ár, trý ár og átta ár. 

Vørn hevur afturlatnu uppboðssølurnar.

Fiskamarknaðurin hevur tær opnu.