Bara ein vil vera varastjóri

Bara ein umsókn er til starvið sum varastjóri fyri føroyska sjúkrahúsverkið. 

Umsóknarfreistin var úti nú klokkan 12.

Varastjórin skal optimera samlaða virksemið í sjúkrahúsverkinum, umframt at viðkomandi skal tryggja miðvísa menningartilgongd og góðskutrygging, stendur í lýsingini.

Umframt at vera varastjóri fyri alt sjúkrahúsverkið, skal tann setti eisini vera læknafakligur ráðgevi og sparringspartnari fyri Heilsumálaráðið.

Varastjórin við læknafrøðiligari barlast verður ovasti ábyrgdarhavandi lækni í føroyska sjúkrahúsverkinum og mannar saman við sjúkrahússtjórunum og varastjórunum annars leiðsluna í sjúkrahúsverkinum.