Formaðurin í døpurhuga

Hetta er helst ein avleiðing av demografisku gongdini í Suðuroynni.

Tað heldur Bogi Mortensen, formaður í VB, sum er sera døpurhugaður nú hondbóltskvinnurnar í VB fáa ikki mannað lið í bestu deildini komandi kappingarár. 

Fleiri spælarar givnir

Síðani í vár eru 10 spælarar givnir á besta kvinnuhondbóltsliðnum hjá VB, og tí fær VB ikki mannað lið í bestu kvinnudeildini komandi kappingarár. 

Í fjør bleiv lið mannað, tí fleiri eldri spælarar vóru við. Men støðan er ein onnur í ár, tí fleiri av teimum yngru kvinnunum fara av landinum at lesa, samstundis sum tær eldru gevast. Í løtuni eru bara 2 leikarar í árganginum frá 1982 til 2000.

Bogi Mortensen heldur, at tað uttan iva eru avleiðingarnar av teirri demografisku skeiklanini, sum hevur verið í Suðuroynni seinastu ártíggjuni.

Fólkatalið minkað nógv

Og gongdin sær ikki góð út, vísa tøl hjá Hagstovuni, tí bæði fólkatalið og talið av føddum børnnum er minkað nógv í Suðuroynni. 

Í 1985 búðu 5.880 fólk í Suðuroynni, men síðani er hetta talið minkað við smáum 1.300 fólkum. 

Og eisini nógv færri børn verða fødd í oynni í dag. Síðani 1985 er talið minkað við meira enn eini helvt. Tí í 1985 vóru 89 børn fødd, og hetta talið var 40 í fjør.  

Og um hugt verður eftir talið av børnum, sum verða fødd í sunnaru helvtini av Suðuroynni, har VB heldur til, so síggja tølini ikki góð út. Bert 19 børn vóru fødd í sunnaru helvtini í fjør, afturímóti 41 í 1985.

Størsta afturgongdin er í Vági. Har vóru 13 børn fødd í fjør, trý vóru fødd í Porkeri, 1 í Lopra, 1 í Hovi og 1 í Sumba. Og formaðurin í VB er í døpurhuga um støðuna og framtíðina hjá bæði liðnum og oynni.

Vilja aftur í Hvonn-kappingina skjótt

Bogi Mortensen sigur, at VB nú hevur gjørt av at leggja seg eftir ungdómsarbeiðinum, er málið, at VB verður at síggja aftur í Hvonn-kappingini um ikki alt ov langa tíð.

Kvinnuhondbóltsliðið hjá VB bleiv nummar trý í Hvonn-kappingini í ár. 

Sigast skal tó, at hóast samlaða fólkatalið og burðartalið er minkað mongu seinastu árini, so vaks fólkatalið við 35 fólkum frá 2016 til 2017. Hetta býtt á Tvøroyri, Vági, Sumba og Øravík.  

Hoyr longru samrøðu við Boga Mortensen, tá hann vitjaði í Summartímanum mánadagin.