Banki lækkar partapeningin við egnum brøvum

Aðalfundurin hjá BankNordik 21.mars skal taka støðu til uppskot frá nevndini í bankanum, sum mælir til at lækka partapeningin í bankanum úr 200 milliónum niður í 192 milliónir krónur.

Tær átta milliónirnar skulu takast av ogn bankans.

BankNordik sigur, at kapitallækkingin er løgfrøðiliga at meta sum útlutan til partaeigararnar.

Tí tær átta milliónirnar, sum partapeningurin verður niðurskrivaður, er útgoldin til partaeigarar bankans sum gjald fyri partabrøv, sum bankin hevur keypt. 

Verður uppskotið samtykt á aðalfundinum, missir bankan 400.000 egin partabrøv á 20,00 kr.

Keyp partabrøv

Hesi partabrøv eru keypt undir skipaða afturkeypinum, sum BankNordik hevur gjørt frá 30.mai 2016 til 30.desember 2016, frá 27.februar 2018 til 31.mai 2018 og frá 6.august 2018 til 21.februar 2019 fyri góðar 39,6 milliónir, sum partaeigarar í bankanum hava fingið.

Tá tær átta millónirnar eru drignar frá, hava partaeigararnir tí fingið góðar 31,6 milliónir kr. 

Kapitallækkingin verður framd til kurs 117,19, sum svarar til miðalkursin fyri afturkeyptu partabrøvini. Hon verður sostatt framd til yvirkurs. 

Og bankin ætlar at keypa fleiri egin partabrøv, tí nevndin biður aðalfundin um at leingja heimildina at keypa til 1.mars 2024.

Nevndin mælir eisini til, at samsýningin til nevndina verður óbroytt. Forkvinnan fær 600.000 kr. um árið, næstformaðurin 400.000 og hini í nevndini fáa 200.000 kr. um árið.