Fiskaútflutningurin minkaður

Føroyar útfluttu fiskavørur frá apríl í fjør til mars í ár fyri tilsamans sjey milliardir og 871 milliónir krónur, vísa tøl hjá Hagstovu Føroya.

Virðið á toski, upsa og hýsu vaks 140 milliónir krónur, og útflutningsvirðið á makreli, sild og svartkjafti vaks 167 milliónir krónur.

Størsti vøksturin er brennievni

Hinvegin minkaði útflutningsvirðið á laksi 271 milliónir. Annar fiskur og fiskaúrdráttur minkaði 253 milliónir krónur í virði frá apríl í fjør til mars í ár.

Minkaði útflutningsvirðið á fiski hetta tíðarskeiðið, vaks innflutningurin 743 milliónir krónur, upp í sjey milliardir og 780 milliónir krónur, ella tilsamans 11 prosent. 

Størsti vøksturin í innflutningstølunum er brennievni. Vit innfluttu brennievni fyri 344 milliónir krónur meira enn árið fyri, ella tilsamans eina milliard og 318 milliónir.