Grikkar krevja endurgjald frá Týsklandi

Grikkaland var hersett frá 1941 til 1944, og fleiri grikskar oyggjar vórðu undir týskum veldi líka til kríggið var av í 1945. Hesi árini lótu útvið 300.000 grikkar lív av krígsávum.

Eisini gjørdi týska hersetingarvaldið seg inn á nógvar dýrgripir í Grikkalandi, og nógv varð stolið.

Í 2016 gjørdi ein kommissión, sett av griksku stjórnini, ta niðurstøðu, at Týskland eigur at rinda Grikkalandi tilsamans 312 milliardir dollarar í endurgjaldi, tað eru umleið 2060 milliardir danskar krónur.

Týskland hevur tikið fulla ábyrgd av ógerðunum undir seinna heimsbardaga, og hevur fleiri ferðir alment biðið um umbering. 

Men samstundis hevur Týskland tvíhildið um, at endurgjaldsspurningurin mótvegis hersettu londunum er avgreiddur. Eittnú fingu griksk krígsoffur 115 milliónir D-markar í endurgjaldi, afturi í 1960.

Kortini hevur grikska stjórnin um dagarnar kravt endurgjald frá Týsklandi. Grikski sendiharrin í Berlin handaði formliga kravið til týsku stjórnina. 

Jyllands-Posten endurgevur týskar fjølmiðlar fyri at samantvinna grikSska kravið við tjóðartingsvalið í Grikkalandi 7. juli. Víst verður á, at hetta er ikki fyrstu ferð, at endurgjaldskrav móti Týsklandi er partur av einum valstríði í Grikkalandi.