Neyðugt at fara afturumaftur við stórum bygningum

Ábøtur eru neyðugar. Nýggj vindeygu skulu setast í Boðanesheimið. Ikki tí, at vindeyguni, sum vóru sett í, tá heimið varð bygt fyri átta-níggju árum síðani, longu eru ov gomul. Men vindeyguni leka.

Semja er gjørd millum Tórshavnar kommunu og byggifelagið um vindeyguni. Byggifelagið skal seta nýggj vindeygu í og umvæla skaðarnar, sum lekin hevur gjørt. 

Byggifelagið skal eisini rinda, men pengar fyri tíðina, sum gomlu vindeyguni hava verið í, verða drignir frá.

Bjálving er vát

Bjálvingin á takinum á Boðanesheiminum er vát, hava royndir staðfest. Men ikki er liðugt at kanna enn, hví so er. Boðanesheimið er ikki einasti stóri bygningurin hjá Tórshavnar kommunu, sum ikki er nóg væl gjørdur.

Kommunan hevur nú samráðingar við tryggingina um skúlan á Argjahamri, har millum annað partar av klædninginum skulu gerast umaftur. Arbeiði fyri góðar fimm milliónir krónur skulu gerast á Argjahamri.

Við Løgmannabreyt er eisini neyðugt at fara afturumaftur. Har er klædningurin eisini trupulleikin. Men hvør eigur trupulleikan eru partarnir ikki samdir um.

Vansin hjá kommununi er, at trupulleikin kom ikki undan kavi fyrr enn fimm ár vóru farin, frá tí at skúlin varð latin komunununi.