Høvuðsreglan er einki plast á sjógv

Høvuðsreglan er, at bannað er at koyra grót á sjógv, sum er dálkað við plasti ella øðrum dálkandi evnum, sigur Umhvørvisstovan.

Einasti máti í løtuni at forða fyri, at spreingileidningar úr plasti fara til havs, er at leggja flotverju, har sum sprongt grót fer á sjógv.

Men Umhvørvisstovan fylgir við í royndunum, sum verða gjørdar uttanlands at gera spreingileidningar úr øðrum evni enn plasti - úr evni, sum ikki dálkar.

Suni Petersen, deildarleiðari á Umhvørvisstovuni, sigur, at í grótbrotum ber til at spreingja við færri spreingileidningum enn í tunlum.

Dálkandi spreingileidningar eru frammi aftur, nú Bakkafrost Farming hevur fingið umhvørvisgóðkenning at leggja grót á sjógv á Norðtoftum.

Bakkafrost Farming ætlar at leggja flotverju út at forða fyri, at plast frá grótinum rekur burtur frá fyllingini.

Bann og avmarking

Treytirnar í umhvørvisgóðkenningini eru tó nógvar. Høvuðstreytin er at avmarka útlátið so nógv sum gjørligt.

Men høvuðsreglan er, at bannað er at koyra grót á sjógv, sum er dálkað við plasti ella øðrum dálkandi evnum, sigur Umhvørvisstovan.

Mett verður, at millum 10 og 30 sentimetrar av plasti eru fyri rúmmeturin av gróti. 57.500 rúmmetrar skulu á sjógv á Norðtoftum.

Verandi í sjónum

Umhvørvisstovan metir, at bara ein lítil partur av plastinum, sum loysna frá grótfyllingini, rekur upp á land.

Størsti parturin verður verandi í sjónum. 

Bakkafrost Farming skal taka upp allar spreingileidningar, sum fara á sjógv, hvønn arbeiðsdag og skráseta tær.

Verður dálking kortini staðfest, kann Umhvørvisstovan krevja, at Bakkafrost Farming ruddar.