Línuskipini ikki so illa fyri

Formaðurin í felagnum Línuskipum, Hálvdan Gudmundsen í Sandavági, sigur, at 14 skip eru í felagnum.

11 teirra høvdu svørt tøl (tað er avlop) á botnlinjuni í fjør. Og 2019 sær út til at verða eitt betri ár enn 2018, sigur formaðurin í Línuskipum.  

Men øll skipini í bólki 3, har sum línuskipini eru, eru ikki limur í felagnum Línuskipum. Okkurt roynir við gørnum og okkurt eftir krabba. 

Línuskipini hava nógvar møguleikar at sleppa á fiskileiðir, bæði undir Føroyum og í sjónum hjá øðrum, sigur Hálvdan Gudmundsen. 

NUMO gjørt kanning  

Niðurstøðurnar í kanningini hjá NUMO eru, at stór spjaðing er í úrslitunum hjá línuskipinum í 2018. 

Okkurt ísfiskalínuskip hevði hampiliga gott úrslit, men tey flestu høvdu munandi hall í rakstrinum í fjør. Frystilínuskipini kláraðu seg tó væl.

Raksturin hjá línuskipum royndist betur í 2018 enn í 2017, er niðurstøðan hjá NUMO. Miðalaldurin hjá línuskipunum var 47 ár við árslok 2018.