Føroyskt oljufelag fingið sekt frá keypsskála

Oljufelagið Atlantic Petroleum fekk í juni 181.108 kr. í sekt frá danska keypsskálanum fyri at bróta reglurnar, sum eru galdandi fyri keypsskálan.

Sektin er goldin, sigur stjórin í Atlantic Petroleum, Mark T. Højgaard, við Útvarpið.

Hann bleiv stjóri í felagnum í mai í ár. Brotini vórðu gjørd, áðrenn hann bleiv stjóri.

Mark T. Højgaard sigur, at hetta fer ikki at endurtaka seg.

Talan er um seks brot, sum Atlantic Petroleum hevur fingið sekt fyri.

Ov seinar fráboðanir

Felagið hevur boðað keypsskálanum ov seint frá um innanhýsis vitan og um aðrar upplýsingar um felagið.

Talan er millum annað um fíggjarálmanakkan fyri 2019. 

Hann kom ikki fyrr enn 8.januar, men skuldi koma fyri nýggjár.

Keypsskálin fekk at vita, at stjórin tá í Atlantic Petroleum var burturstaddur, og tí kom fíggjarálmakkin ikki fyrr enn 8.januar.

Men ta umberingina góðtekur keypsskálin ikki.

Í grunn

Føroyska oljufelagið hevur millum annað eisini fingið sekt fyri at koma ov seint við roknskapinum fyri triðja ársfjórðing í fjør.

Talan er tó bara um tríggjar dagar.

Annars er talan um upplýsingar um eina oljuleið og viðkvæmar niðurstøður úr einari frágreiðing hjá Erhvervstyrelsen.

Atlantic Petroleum, sum varð stovnað í 1998, hevur verið skásett síðani 2005.

Sektin fer í ein grunn, Nasdaq Nordic Foundation, sum stuðlar gransking.

Síðani í mai í ár hevur ikki borið til at keypa og selja partabrøv í Atlantic Petroleum í danska keypsskálanum. 

Sektin er tað sama sum tað kostar at vera skrásettur í tvey ár í keypsskálanum í Keypmannahavn.