Skulu ikki gjalda fyri at eiga í Føroyum

Pápar, sum eru uttanlands í lestrarørindum, skulu eisini sleppa undan at gjalda, tá konan ella unnustan eigur í Føroyum. 

Uppskot til kunngerð er skrivað og sent til hoyringar. Sambært galdandi reglum frá 2009 kann kvinna, sum er í útbúgving uttanlands, eiga í Føroyum ókeypis.

Men vil ein pápi, sum er í útbúgving uttanlands, at barn hansara skal føðast í Føroyum, verður kravt gjald fyri ta tænastuna, um mamman ikki er lesandi.

Galdandi fyri bæði kyn

Men hetta verður nú broytt, so somu reglur verða galdandi fyri bæði kyn.

Tað var í oktober í fjør, at Niels Rødgaard og unnustan, Rosa Heinesen, sum búgva í Danmark, har hann er undir útbúgving, fingu at vita, at tey skuldu gjalda fyri at eiga sonin Rana í Føroyum. 

Rokningin var 26.000 krónur. Tey vóru í skundi komin til Føroya, fyri at vera saman við mammu Niels, sum hevði krabbamein og lá til tað síðsta. 

Niels Rødgaard fegnast um, at myndugleikarnir eru komnir til vit og skil og rætta skeivleikan í lógini.

Meira verður at frætta í útvarpstíðindunum klokkan 12:20.