Ruðuleiki í Spania: Starvsfólk rýma frá búfólkum

Í Spania er støðan ring, nú koronakreppan ger um seg av álvara. Í fleiri ellisheimum og eldrasambýlum eru starvsfólkini rýmd, og nógv eldri fólk eru funnin einsamøll. Fleiri lógu deyð í songini.

Tað sigur spanski verjumálaráðharrin, Margarita Robles, við eina spanska sjónvarpsstøð, skrivar bretska kringvarpið, BBC.

Greinin heldur fram niðanfyri

Margarita Robles sigur, at starvsfólkini eru rýmd av nøkrum ellisheimum, eftir at koronavirusið er farið at gera um seg av álvara.

Herurin skal hjálpa til

Spania er eitt av harðast raktu londunum í Europa av koronavirusinum, og herurin í landinum hevur fingið boð um at hjálpa til.

Tað vóru hermenn, sum komu fram á tey gomlu á ellisheimunum, sum vóru einsamøll. Spanska ákæruvaldið sigur seg fara at kanna viðurskiftini, skrivar BBC.

Seinasta uppgerðin í Spania vísir, at meir enn 35.000 fólk eru smittað við koronavirusinum og at meir enn 2.300 fólk higartil eru deyð av sjúkuni.