Neistin fingið nýggjan venjara

Stefan Arnar Gunnarson eitur nýggi venjarin hjá Neistanum. 

Íslendingurin, sum er 42 ára gamal, avloysir Trónd Kragesteen sum venjari hjá besta mansliðnum hjá Neistanum. 

Hann skal eisini taka sær av 1. deild, d.18 og venja børn og ung hjá bláa havnarfelagnum. 

Drúgvar venjararoyndir

Arnar, sum hann verður nevndur, hevur verið venjari í yvir 20 ár, og hevur serliga vant ungar spælarar m.a. í Akureyri, Selfoss og HSG Krefeld í Týsklandi.

Neistin hevur mist fleiri lyklaleiklarar undan komandi kappingarári. Landsliðsmálverjin, Nicholas Satchwell, er farin til KA úr Akureyri, toppskjúttin, Dánjal Ragnarsson, skiftir til Skanderborg og Tróndur Mikkelsen fer til SUS Nyborg.

Stefan Arnar Gunnarsson hevur skrivað undir sáttmála við Neistan kappingarárið 2020/21.