Skulu ikki vitja á røktarheimum fyrstu 14 dagarnar

Fólk, sum hava verið uttanlands, verða biðin um ikki at vitja fólk í ellisheimum, røktarheimum ella í sambýlum, fyrr enn 14 dagar eftir, at tey eru komin til Føroya.

Ber ikki til at bíða í 14 dagar, skulu fólk í øllum førum bíða í sjey dagar, og kanna seg fyri koronu sætta dagin.

Somu reglur eru galdandi, um fólk hava verið til tiltøk, har smittuvandin er stórur, ella tey hava havt samband við fólk, sum koma úr útlondum.

Seks fólk

Annars kunnu fólk í heimunum og sambýlunum hava seks fólk, sum kunnu vitja tey. Eitt teirra kann skiftast um vikuna.

Hetta er tann nýggi, felags leisturin, hjá kommununum fyri vitjandi í búeindum á eldraøkjunum.

Tey, sum vitja, skulu skráseta seg. Og fermetratalið avger, hvussu nógv kunnu vitja í senn, tí frástøðan skal haldast.