65.000 tons av svartkjafti eftir at fiska

Vertíðin eftir svartkjafti er við at vera av á hesum sinni, nøkur skip eru givin, og eru farin at rigga til at fara á makrelveiðu í august.

Nøkur skip royna kortini fravegis eftir svartkjafti, og í fyrradagin vóru 8 skip á svartkjaftaveiðu, upplýsir Fiskiveiðueftirlitið.

Føroyska kvotan av svartkjafti er 315.000 tons í ár, og av teimum eru 250.000 tons fiskað.

Skipini hava havt loyvi at landa uttanlands, og higartil eru góð 75.000 tons seld uttanlands, í Íslandi, Noreg, Danmark og í Írlandi.

Havsbrún hevur tikið ímóti 143.000 tonsum, og skip sum virka og pakka fiskin umborð, hava landað góð 31.000 tons.

Sostatt eru 65.000 tons av svartkjafti eftir at fiska, upplýsir Fiskiveiðueftirlitið.

Tað er ikki óvanligt, at skip goyma kvotu av svartkjafti, og so fiska svartkjaftin seinni í ár, í november ella desember, tá svartkjafturin fer suðureftir aftur. Tá er hann betri fyri enn hann er nú.