Karelia kemur í Nólsoyarfjørð seinnapartin

Russiski trolarin Karelia kemur á Havnina klokkan eitt í dag.

Karelia fór til Kaliningrad fyrst í august, men er nú á veg á fiskileið í NEAFC-økinum eystan fyri Føroyar. 

Korona varð staðfest umborð, tá trolarin lá í Norðhavnini í Klaksvík síðst í juli. 

Sum skilst kemur Karelia ikki til bryggju í Havn, men fer at liggja í Nólsoyarfirði.

Hevur eykalut við

Sambært umboðnum í Føroyum, kemur Karelia til Føroya við einum eykaluti til Yantarnyy, sum framvegis liggur á Oyrareingjum og bíðar eftir farmaskipi, sum skal taka fiskin.

Fólk frá umboðnum, sum er Faroe Ship, fara út eftir eykalutinum, sum er til motorin hjá Yantarnyy, og so heldur Karelia leiðina fram til fiskaskap.

Karelia og Yantarnyy hava sama eigara.

Tey, sum eru við Kareliu, vórðu kannað tríggjar ferðir fyri koronu, áðrenn skipið fór úr Kalingrad, hevur umboðið í Føroyum fingið at vita. Eingin er positivur.