Tríggir tingfundir í næstu viku

Tríggir løgtingsfundir vera á næstu viku.

Mikudagin eru munnligir fyrispurningar fyri fyrstu ferð í hesi tingsetuni.

Týsdagin fer løgtingið at viðgera uppskotið hjá landsstýrinum um at broyta vallógina, so fólk, sum eru undir verjumáli og hava fingið rættarliga myndugleikan frátiknan eftir verjumálslógini, hava valrætt á kommunuvali og kunna stilla upp til kommunustýri.

Politi og eykajáttanir

Uppskotið hjá Tjóðveldi um at yvirtaka politiið er eisini á skránni týsdagin. Hósdagin fer løgtingið millum annað at viðgera tvey uppskot um eykajáttanir.

Annað er frá Javnaðarflokkinum um at játta 1,6 mió. kr. til at útbúgva ungar læknar. Pengarnir skulu takast frá játtanini til sendistovur.

Hitt er frá Beintu Løwe í Tjóðveldi um at játta tríggjar milliónir til trygdarútgerð til tunlarnar norður um Fjall og aðrar tunlar.