Atlantsflog og flogvøllurin fáa nú hjálp

Uppskotið um eykajáttan, sum Jørgen Niclasen, landsstýrismaður í fíggjarmálum, hevur lagt fyri tingið, vísir umleið 129 milliónir krónur í halli.

Meginparturin av eykajáttanini fer til Atlantsflog og Vága floghavn. Skotið verður upp, at landið setur 100 milliónir krónur í Atlantsflog  og 15 milliónir í Vága floghavn, í kjalarvørrinum av koronukreppuni. 

Kenna sviðan av afturgongdini

Landsstýrið sigur, at koronufarsóttin hevur síðani mars mánaði havt við sær, at ógvuslig minking hevur verið í flogferðsluni kring allan heim, og tað hava Atlantsflog og Vága floghavn eisini merkt.

Stóra afturgongdin hevur havt við sær, at inntøkurnar eru minkaðar, og at kassin er drenaður.

Tí er neyðugt, at landið kemur við kapitalinnskoti í Atlantsflog og Vága floghavn, sigur landsstýrið. Uppskotið um eykajáttan kemur til viðgerðar í tinginum hósdagin.