Fáa nýggjari Pison í nýggja árinum

Smápartafelagið Miðdalsenni á Viðareiði, ið eigur línuskipið Pison, hevur keypt frystilínuskip úr Noregi, skrivari Norðlýsið.

Talan er um Nyvoll Senior, sum er bygdur í Vági í 1987. Tá kallaðist skipið Vestfart, og hevði heimstað á Eiði.

Pison hjá smápartafelagnum Miðdalsenni er bygdur i 1961. 

Eyðstein Sørensen, stjóri í felagnum og skipari á Pison, sigur við Norðlýsið, at skipið, sum nú er keypt, verður eitt stórt framstig, hóast tað er bygt í 1987, og gevur nógv betri møguleikar, serliga á fjarleiðum.

Tekur 250 tons

Nýggi Pison fer fyrst og fremst at royna undir Føroyum, á Flemish Cap og í grønlendskum sjógvi.  Hann tekur 250 tons, og 15 mans vera við skipinum.

Nýggi Pison kemur á føroyskar hendur 5. januar næsta ár.

Prísurin verður ikki upplýstur, skrivar Norðlýsið.