Halda fram við politikkinum hjá Trump í miðeystri

Nýggi amerikanski uttanríkisráðharrin, Antony Blinken, hevur í eini telefonsamrøðu við ísraelska starvsbróður sín, Gabi Ashkenazi, sagt, at USA fer at halda fram við ætlanunum í sonevndu "Abraham-semjunum", sum Donald Trump setti sjøtul á. 

Abraham-semjurnar snúgva seg um at styrkja diplomatisku sambondini millum Ísrael og arabisk og muslimsk lond. Seinastu mánaðirnar hevur Ísrael gjørt avtalur við Sameindu Arabisku Emiratini, Bahrain, Sudan og Marokko.

Roknað verður við, at nýggi amerikanski forsetin, Joe Biden, fer at flyta amerikanska uttanríkispolitikkin eitt sindur burtur frá "America first"-hugsanini hjá Donald Trump, men Biden hevur eisini givið ábendingar um, at hann ætlar at halda fram við arbeiðnum, sum Trump byrjaði við Abraham-semjunum.

Í telefonsamrøðuni við Ashkenazi vissaði Antony Blinken eisini Ísrael um, at USA hevur ísraelsku trygdina sum hjartamál, og at Washington fer at arbeiða tætt saman við Ísrael um trygd og frið í økinum.