USA: Ferð komin á flogferðsluna aftur

Flogferðslan í USA hevur aftur tikið dik á seg. Amerikanska flogfelagið, American Airlines, selur nú næstan eins nógvar ferðaseðlar, sum áðrenn korona rakti.

Ferðaseðlasølan er nú 90 prosent av tí, hon var áðrenn koronu. Flogførini hjá teimum byrja nú eisini at fyllast, og 80 prosent av øllum setrunum eru nú upptikin.

Tað skriva fleiri amerikanskar miðlar. Í fjør misti flogfelagið 56 milliardir krónur. Tað er eftir at fleiri og fleiri amerikanarar eru koppsettir fyri COVID-19, at fólk aftur bíleggja flogferðaseðlar.

Myndugleikarnir boðaðu frá, at sunnudagin var dagurin, tá ið flest ferðafólk vóru í flogfari í meira enn eitt ár.