Vinnan kann draga negativa rentu frá

Bæði Sjálvstýri og Framsókn taka undir við uppskotinum hjá landsstýrinum um, at vinnan kann draga negativa rentu frá í skattinum.

Stórur meiriluti er tí í Fíggjarnevndini fyri uppskotinum hjá Jørgeni Niclasen, landsstýrismanni.

Við uppskotinum verður negativ renta javnsett við positiva rentu fyri pengar, sum standa í peningastovnunum.

Kapitalvinningur skal rindast av positivari rentu. Og nú skal negativ renta dragast frá í skattinum hjá vinnuni. 

Negativ renta óneyðug

Javnaðarflokkurin og Tjóðveldi taka ikki undir við uppskotinum.

Tað er ikki neyðugt hjá peningastovnunum at taka negativa rentu, siga tey.

Peningastovnarnir hava stór yvirskot, og onkur rindar serstakt, stórt vinningsbýti.

Harafturat ger negativ renta, at hús verða keypt, ikki til at búgva í, men sum ein íløga. Hetta ger, at prísirnir vaksa nógv, siga Javnaðarflokkurin og Tjóðveldi.