VÍF og StÍF hava góð kort á hondini

Menninir hjá VÍF og kvinnurnar hja StÍF hava góð kort á hondini undan fjórðu FM-finalunum i hondbólti mikukvøldið.

VÍF vann tepran sigur á H71 í einum spennandi dysti í Vestmanna seinnapartin. Dysturin var javnur, og liðini skiftust um at vera frammanfyri, men í avgerandi løtuni vóru vestmenningarnir sterkari og kundu fegnast saman við viðhaldsfólkunum.

VÍF er nú frammanfyri 2-1 og kann vinna føroyameistaraheitið við sigri mikukvøldið í Hoyvík.

Í høllini á Hálsi vann StÍF stórsigur á Neistanum í kvøld, og strandingar løgdu seg sostatt á odda 2-1. Haruka Gima var við aftur hjá útiliðnum, og saman við liðfeløgunum smurdi hon bláa heimaliðið av.

StÍF kann nú vinna føroyameistaraheitið á heimavølli, tá Neistin kemur á vitjan á Skála mikukvøldið.

VÍF - H71 (Burn-deildin, Vestmanna)
28-26 (15-17)

Neistin - StÍF (SMS-deildin, Havn)
20-27 (9-13)