- Tíðindi, mentan og ítróttur
Samanbindingin kostar eina millión minni
Fíggjarnevndin undrast stórliga á, at prosjektering og kostnaðarmeting fyri at binda saman H-bygningin og B-bygningin á Landssjúkrahúsinum ikki eru við í upprunaligu ætlanini, tá H-bygningurin varð prosjekteraður, tí eyðsæð er, at ein samanbinding mátti vera. Staðfestast kann bara, at so er ikki.
Tað heldur Fíggjarnevndin vera átaluvert.
Fíggjarnevndin hevur roknað út, at samanbindingin kostar eina millión minni enn tær 71,8 milliónirnar, landsstýrið biður um.
Fíggarnevndin hjá løgtinginum tekur undir við uppskotinum hjá landsstýrinum um eykajáttanir, men ikki uttan broytingar.
Ternan og Tekniski skúli
Nevndin sigur, at tað er snøgt sagt óskiljandi, at so stórur munur er á upprunaligu kostnaðarmetingini og veruliga prísin, nú Ternan verður umvæld.
Tekniski skúla í Klaksvík og Sjóndepilin skulu hava nýggjar tekjur fyri 15 mió. kr.
Í sambandi við afturvendandi rakstrarútreiðslur heitir Fíggjarnevndin á landsstýrið um at gera sær størri ómak, so tær í so stóran mun sum gjørligt eru útreiðsluneutralar.
Skulu rakstrarjáttanir hækka, eiga aðrar játtanir at lækka samsvarandi, sigur Fíggjarnevndin.
Hækka stuðul til at umvæla brimgarðar
Fíggjarnevndin mælir til at hækka stuðulin til kommunur til at umvæla havnir og brimgaðar úr tveimum upp í tríggjar milliónir krónur.
Og Fíggjarnevndin gevur landsstýrismanninum í fíggjarmálum loyvi til at selja landsins partabrøv í Tjaldri.